好可惜，因為疫情同埋限聚令嘅關係，婚禮及婚宴被逼要分開兩日，先做出入門及註冊，稍後先至補擺晚宴。
係度同大家分享下出入門及證婚嘅一點一滴啦。
籌備篇：
1. 大家要上多d 唔同嘅婚禮blog，從中join 多d whatsapp group，同唔同準新人交流。
2. 婚禮用品唔一定樣樣都要買新，可以係facebook ／ Whatsapp Group／ 百利地庫 / 朋友圈中買到好多二手而仲好新淨嘅野架，環保d又可以慳d。
3. 除左金都同百利之外，仲有一間叫E&M Collections 嘅婚禮用品店，佢定時會有open day，場內嘅款式同價錢亦都非常親民。
4. 好多物資淘寶真係幫到你架，連運費好可能比係香港買更加平，值得大家留意。
出入門：
攔門花球：係金都，百利同埋好多賣婚禮用品嘅店舖見到好多攔門花球都唔合心水，好巧合地係一個新娘
group 見到一個二手而又係親手做嘅花球，價錢亦都比出面買嘅平，就決定買左佢啦。
花球：
花球有分鮮花、保鮮花同埋絲花。鮮花有香味，但係要用水養住，要小心處理。保鮮花方面，雖然價錢係貴，但係仿真度十足，又保存得耐。至於絲花，價錢比較平，又唔怕凋謝。
原先小妹諗住出入門用絲花，證婚及晚宴先用鮮花，可惜突如其來婚宴要延期，所以出入門及註冊只能用絲花。
花球唔止可以係婚禮用品店同埋花店買，其實仲有好多唔同嘅網店，可能你會擔心未見過實物就買會唔穩陣，但其實好多都有open day，你地可以上去睇完之後先決定買唔買架。
車花：
用得花車，又點少得裝飾呢？係唔同婚禮用品地方見到車花或花車公仔價錢真係驚人，小妹實在唔捨得，最後又係係婚禮用品whatsapp group 度同已婚嘅新娘購入，又靚又平。
花車:
之前已經同大家講過小妹對倫敦的士幾有情意結（見https://djwedding2020.blogspot.com/2020/03/dj_11.html ） ，坐過之後，真心覺得，靚就真係幾靚，但係夏天坐就真係好熱，因為佢冷氣唔夠，不過車速就比預期快，司機亦都非常準時，亦都無因為貪方便而叫我地經隧道到達目的地。
證婚場地：
早前同大家講過，因為疫情關係，小妹唔再能夠用晚宴場地做證婚，律師樓嘅所謂特式場地亦實在太不喜歡，最後搵到一個適合20人嘅證婚場地 (見：https://djwedding2020.blogspot.com/2020/04/dj.html ）。
場地真係好靚，除左加錢整左兩個人名牌之外，我地都係帶左小小相架，氣球同埋相簿做佈置。
主持人亦都非常專業，好熟悉輕婚禮嘅流程，即使律師離開後個婚禮亦都好有氣氛。
期待遲d再同大家分享晚宴嘅一點一滴。
