DJ婚享記 : 試衫篇 - 永隆繡莊+ 錦發繡莊

估唔到係「冠南華」攪左成兩個鐘，食個lunch後，又繼續是日嘅「尋褂之旅」。

「永隆繡莊」同「錦發繡莊」兩間都係位於上海街，即使身邊嘅朋友極力推介「錦發」，D小姐都係同媽媽睇晒兩間啦。

「錦發」嘅招待比「永隆」更為熱情，除此之外，「錦發」個嬸嬸仲同D媽媽講，話褂係媽媽送俾個女嘅嫁妝之一，阿女乖唔乖呀、聽唔聽話、有無準時俾家用呀？有就揀件靚D嘅俾佢啦，唔乖嘅就要自己租架喇，好似剛剛行出舖個女仔，一讀完書就話結婚，從來無俾過家用，就要自己俾錢租喇。

嬸嬸仲好好人，同我地講，如果無咩特別要求，例如一定要著頭褂之類，可以結婚前幾個月返黎租都得。

返屋企之後問過朋友，原來褂真係媽媽租俾阿女架，多謝媽媽，我會乖乖聽話架喇。