DJ婚享記 : 姊妹裙-thirty 30

經過之前嘅不愉快經歷後，D小姐無意中發現原來租婚紗晚裝嘅地方同另一間姊妹裙專門店有聯繫，心諗"介紹得應該唔會太差呱?"，加上憑單據仲有折扣優惠添! 係facebook見到D款式亦都唔錯，決定約個時間上去睇下。

Thirty30位於尖沙咀某舊式大廈內，無電梯直達，要行樓梯，但交通總算方便，平時約朋友食飯前後去都無問題。

姊妹裙款式好多，仲有sample可以試上身，雖然試上身果件未必係你喜歡嘅顏色，但係總算睇到著上身個效果。

D小姐大大話話都試左5-6款，係店主協助下，好快就揀好顏色同款式啦。

12月內會安排各位姊妹度身，希望3月尾4月頭可以收到貨啦。

DJ婚享記 : 姊妹裙- Akai Bridesmaid Dresses 晚裝姊妹裙專門店

係好多野都落實左之後，係時候開始處理姊妹們嘅服飾啦。

今時今日揀地點最緊要係交通方便，始終都唔想姊妹們只係為左度身攞衫而要舟車勞頓。

之前有B2B 介紹位於觀塘工廈嘅Akai Bridesmaid Dresses，價錢優惠又多款，上佢地facebook睇過決定約個時間上去睇下實物。

我地約左店主某星期六5:00，由於我地早左到，加上聽到仲有客人係舖度試衫，我地先係大堂梳化度等到夠鐘先至入去。

到左5:00，去到店門外見到裡面有一大班兄弟係度度身，完全唔似就快搞掂，舖面亦都非常之細，D小姐好唔容易先至逼到入去，而J先生就要係門外等候。

雖然店主好簡單地講左句「隨便睇睇」，但係我地感覺唔到有任何招呼，直到5:15，班兄弟依然係到度緊身，甚至嬉戲，店主亦無意欲令佢地盡快完成，完全唔覺得班兄弟短時間內會消失。

直到5:30，我地真係好嬲，咁嘅服務絕對不能接受。


1. 你約左我5:00，如果4:55上個時段嘅客人仲係度，你係咪應該通知我一聲? 而唔係要我無了期咁等呢?

2. 你約左我呢個時間，係一個commitment ，你連咁簡單嘅事都commit 唔到，咁你他日commit 幾時交到貨，我地又點信你呢?

3. 我地係俾錢果個，你都可以咁樣對我地，咁你又會點樣對我班姊妹? 又要佢地無了期咁等咩?


最後真係氣都慳返啖，簡單一句「我地都係唔阻你做生意喇」，就走左啦。

店主最後成7:00先至Whatsapp我地道歉，相信果班兄弟剛剛先離開店舖，店主俾我地嘅解釋居然係「今天預約比較滿，人客試耐左」，相信我地決定唔選擇呢間舖都係正確嘅，費事第日佢突然接到好多單，要延期交貨，咁就唔係太好啦。

呢間舖簡直不知所謂。

DJ婚享記 : 婚展篇 - 婚展 (第五回)

唔經唔覺又一個月，眨下眼又到婚展，今次返返黎會展喇，由於我地好多野已經安排晒，今次黎都係唔係太大目標，旨在睇下有無咩漏，順便再試下酒、睇下有無穩陣少少又好睇嘅餅卡選擇、睇下唐餅、仲有睇下有無更靚嘅花球，主要都係行下睇下。

同之前幾次一樣，為左慳得一蚊得一蚊，今次我地都係用免費飛，而呢個主辦單位嘅好處係：每次婚展都有個counter，只要填份簡單嘅問卷，就會有小禮物同下次嘅婚展飛送，咁就唔需要每次都要四圍搵免費飛啦。

距離big day得返有半年時間，時間真係過得好快呀。

DJ婚享記 : 影相篇 - Bliss - 香港篇

唔經唔覺仲有半年多少少就到我地嘅大日子啦。早前係深圳影完相唔夠一星期，Bliss嘅職員已經通知我地可以上去拎返d相，數量比預期多，效果亦都唔錯，相信執完之後應該會更加好，呢批相亦都可以令我地知道係香港影果時有咩改進空間，同埋有冇邊d pose我地係影漏左。

好快就輪到香港嘅拍攝啦。當日我地晨早10點就到左Bliss嘅工作室度化妝換衫，化妝師阿Pat先同D小姐化妝，然後換完衫再set頭，隨後再幫J先生補補粉同gel頭，到大約中午我地就出發去第一個景點：馬灣喇。

去到先發現馬灣公園有部份地方俾人book左做證婚場地，唔能夠入去拍攝，有點美中不足，我地唯有轉移去影下花草樹木同大貝殼，由於我地都唔係好識得擺pose，所以攝影師阿Sam都比較嚴格地去指導我地嘅動作，間中更加會同助手Ryan示範俾我地睇添。拍完花草樹木後，就到重點嘅沙灘青馬大橋景了，之前我地已經決定左想影返張J先生抱起D小姐嘅相，由於J先生唔係太習慣點樣抱，所以影出黎嘅效果一般，但經過幾次試驗後，J先生終於可以抱起D小姐影張靚靚相喇。

離開馬灣後，我地出發去第二站：石澳。

颱風山竹吹走左石澳出名嘅情人橋，令到婚攝熱點又少左一個啦，不過我地仍然可以係彩色小屋同石灘度影相，可惜果度略嫌大風，條路又難行，D小姐又做唔到攝影師要求嘅pose，已經開始想發癲喇，好彩係J先生嘅安撫下，順利完成第二站嘅拍攝，之後就去最後一站：赤柱影夜景喇。

我地最原先嘅計劃係去完第一站嘅馬灣會去赤柱，夜景就係中環影，不過由於環境因素，我地放棄左中環，改左下午去石澳，夜晚就去赤柱。

赤柱嘅夜景比想像中靚，算係有d驚喜，不過景點其實黎黎去去都係果幾度，好處係女廁又少人又乾淨，非常適合D小姐係果度換晚裝同補妝。

影完之後就起程返bliss還衫喇，可能時間比較長同舟車勞頓，呢一日比深圳拍攝更加累同辛苦。

大約10日之後我地就收到D相喇，可能係因為天色及景點問題，整體顏色無深圳批相咁好，再加上唔知係化妝set頭唔一樣，定係攝影師影相角度問題，我地都覺得深圳嘅相比較滿意。

兩輯相total有成413張，要係當中揀50張去執，再放入相簿，實在非常有難度，經過D小姐及J先生數個小時嘅搏鬥後，終於成功完成喇，稍後會約Bliss去傾下d相要點樣執，再製作油畫同相簿，希望執完後d相見得下人啦。

DJ婚享記 : 影相篇 - Bliss - 深圳篇

唔經唔覺籌備婚禮已經接近半年喇，confirm係「Bliss Wedding 」影Pre-Wedding都有成4個月，眨下眼就到了。

之前已經講過我地會分開兩次影，一次深圳、一次香港，今次就首先影左深圳，係影之前嘅3個星期，Bliss就會同我地開會兼揀衫，主要講兩日拍攝嘅詳情，仲有就係決定埋係香港拍攝嘅3個location，當然有咩問題都可以一次過問埋啦。

由於星期六一早就要係深圳集合，所以我地需要早一日放工後去Bliss度攞拍攝用嘅衫及飾物，再食埋個簡單嘅晚餐後就各自返屋企準備及休息了。

第二日早上8點就要到達羅湖，換句話講D小姐同J 先生6點就要起身，然後7點半係上水集合再一齊過關，好好彩地過關比想像中快及順利，令我地可以準時係深圳集合。

經過大約1小時45分鐘嘅車程，我地終於到達位於惠州嘅哈斯塔特小鎮。周圍嘅環境同我地之前係相度見到嘅一樣，相當有歐洲風情，唔講都唔知呢度係中國。

到左化妝間之後，化妝師阿蘭就為D小姐換衫同化妝變身，再為J先生gel頭修眉，過程都非常爽手。

完成早上嘅室外攝影後就到午飯時間，餐盒係由司機代購，獨特嘅味道真係令我地難以下嚥，加上因為曬左成朝，又熱又攰，真係無咩胃口，食左幾啖就無食了。

午飯之後，就係時候影室內嘅studio，studio比我地想像中要大，仲有好多唔同嘅主題，真係有d花多眼亂，影完studio後再換晚裝同便服繼續進行餘下嘅拍攝喇。

全日攝影師阿勇都好有心機教我地擺pose，連細微至手指點樣擺都會有要求，務求影得靚靚自然。更值得一讚嘅係影完每張相之後佢都會check下我地影得靚唔靚、笑得自唔自然、有無眨到眼、燈光夠唔夠等等，影得唔靚就會再影過，咁樣就唔會事後先發現影唔到靚相，想補救都救唔到啦。

影完大約17:30左右，係時候執拾用品準備離開喇，返到羅湖大約係7點半到，順利過關後返屋企放低行李就衝去醫肚，回家休息後第二朝又要去還衫喇。

兩星期後就到香港拍攝了，希望可以係拍攝之前睇下我地深圳影嘅相，睇下有d咩改進空間啦。

DJ婚享記 : 婚展篇 - 婚展 (第四回)

唔經唔覺又一個月，話咁快又到婚展，今次有d唔同嘅係移師到九龍灣國際展貿中心，亦係我地第一次黎呢個場地所舉辦嘅婚展。之前已經聽唔少網友講呢個婚展規模較細，亦無咁多野睇，但我地覺得點都要黎一次觀摩下，話唔定會有意外收穫呢。

同之前幾次一樣，我地都係留意住唔同嘅網站，睇下有無免費飛，慳得一蚊得一蚊嘛，結果當然係順利搵到啦。九展嘅婚展主要分三個場館，六樓一個三樓兩個，唔好處就係場館之間距離較遠，但好處係相關嘅資料會集中一齊，例如婚宴場地及場地佈置會集中係一個場館，既可以方便比較，亦可以慳返d時間唔駛行唔岩用嘅場館。

其實今次黎無話有咩特別目標，主要都係想睇下同拎多d資料，始終好多野都仲未搞掂。

無期望下竟然有驚喜！是日驚喜收獲就係搵到對戒，之前婚展前前後後試左咁多間店之後，原本諗住十二月頭去心水店鋪落訂，點知俾我地搵到更加喜歡嘅款式。

心水牌子係Maggris，佢地標榜所有對戒都係訂造，絕對唔會有人試戴過。

每一個款式都可以揀鉑金同埋白色黃金，原價係一樣架，只不過折扣係唔同，計埋折扣之後，一對嘅價錢都係相差$1000左右。

當日Sales Jacky好細心地根據我地手型同大細，介紹左唔同款式俾我地，亦用唔同方法去幫我地兩個揀最合心水嘅一款。

揀好之後，Jacky就幫我地度呎寸再倒模，大約六星期之後先會ready，呎寸真係perfect fit之後先會到下一步嘅製作程序，到最後先至刻字，前後大約需要預幾個月時間架。

距離big day只有七個幾月時間，時間真係過得好快呀。

DJ婚享記 : 試衫篇 - 趙太恤衫

試衫試衫，唔經唔覺就黎Pre-wedding喇。由於J先生工作上主要係casual wear，所以屋企恤衫唔多，黎緊Pre-wedding同Big Day都需要著得靚靚仔仔，所以都係時候幫佢添置一件新恤衫了。

係網上睇好多wedding blog，「趙太恤衫」呢四個字經常出現係唔同嘅blog，每個blog都係讚不絕口，咁當然都上去睇下。

舖頭雖然唔算太大，但客人絡繹不絕，而趙太亦非常友善，只要同佢講咩場合用，佢就會即時推薦邊款恤衫最適合；而決定之後，會先幫你度身，再俾件岩size嘅恤衫你試，試完之後趙太更會即時同你改到岩身為止，而埋單只係138蚊，比出面舖頭更平，唔怪得所有人都有讚無彈，絕對值得推薦。

DJ婚享記 : 試衫篇 - Carmine Wedding Dress & Suit

完成左D小姐嘅馬拉松試衫之旅，揀定左租衫舖頭後，終於都輪到J先生搵衫了。由於D小姐租婚紗間舖頭男禮選擇唔多，所以J先生決定去出面租男禮，今日就來到係網上風評唔錯嘅「Carmine Wedding Dress & Suit」。

一去到門口，已經見到有好多鞋係度，可見生意非常唔錯。呢度雖然都有婚紗租，但主要都係男禮，可以選擇租或買，價錢唔係差太多，每件都可以試上身，店員亦都好友善，可以借恤衫俾我地試男禮，亦會推介唔同款式，J先生都試左好多件，始終覺得灰色及酒紅色最適合佢，當中有一件酒紅色嘅絨面禮服好靚，價錢亦比想像中要平，但未有適合嘅size，不過店員話男禮其實唔駛咁早訂，所以都係睇多幾間先再決定。

DJ婚享記 : 試衫篇 - Ma Cherie Bridal

D小姐係facebook度見到呢間「Ma Cherie Bridal」嘅相相當吸引，一直都好想黎試，好可惜要等成兩個幾星期，而之前間婚紗店又set左個deadline俾我地，要我地係限期前覆佢先至可以有優惠，咁無辦法啦，唯有俾左訂去租果間婚紗店果件叮叮婚紗先。

由於已經有心水叮叮婚紗，敬酒紅裙又揀好左，所以今次只係試迎賓晚裝。

Like + Share facebook page可以試五條，我地係ipad揀左心水之後，店員再篩選我地big day有期嘅裙俾我地。

有別於其他店舖，呢度係唔可以睇左實物先至揀要試邊五條，只可以憑ipad上嘅相去決定，令我感覺唔係太好。

五條裙裡面，有兩條係見左實物之後已經唔多喜歡，但既然拎左出黎，唔試又無得轉其他，咁就唯有試埋佢啦。

其餘三條雖然感覺唔差，但係一黎感覺佢地係試身階段服務已經唔係太友善，二黎分開多個地方租衫有一定嘅唔方便，三黎單租一件迎賓晚裝價錢有d貴，所以都係諗住試下係其他店嘅sample sale買，又或者係返租婚紗間舖度租。

DJ婚享記 : 試衫篇 - 永隆繡莊+ 錦發繡莊

估唔到係「冠南華」攪左成兩個鐘，食個lunch後，又繼續是日嘅「尋褂之旅」。

「永隆繡莊」同「錦發繡莊」兩間都係位於上海街，即使身邊嘅朋友極力推介「錦發」，D小姐都係同媽媽睇晒兩間啦。

「錦發」嘅招待比「永隆」更為熱情，除此之外，「錦發」個嬸嬸仲同D媽媽講，話褂係媽媽送俾個女嘅嫁妝之一，阿女乖唔乖呀、聽唔聽話、有無準時俾家用呀？有就揀件靚D嘅俾佢啦，唔乖嘅就要自己租架喇，好似剛剛行出舖個女仔，一讀完書就話結婚，從來無俾過家用，就要自己俾錢租喇。

嬸嬸仲好好人，同我地講，如果無咩特別要求，例如一定要著頭褂之類，可以結婚前幾個月返黎租都得。

返屋企之後問過朋友，原來褂真係媽媽租俾阿女架，多謝媽媽，我會乖乖聽話架喇。

DJ婚享記 : 試衫篇 - 冠南華

自從黑店事件之後 (按此)，J先生同D小姐決定出去租過晒d衫，而經過朋友介紹之後，決定褂分開租，而唔join婚紗店嘅package。

由於D媽媽對褂唔係太熟悉，所以決定先去出名服務好及老字號嘅「冠南華」了解下市況。

「冠南華」有分中式及西式兩個部門，九龍及港島各有分店，呢一日因為J先生要返工，所以D小姐就同媽媽一齊去「尋褂」喇。

去到「冠南華」，嬸嬸好熱情咁招待我地，又介紹左唔同款式俾我地，D小姐試左好幾件。

傳統褂主要分五大類型:

1. 褂皇
2. 褂后
3. 大五福
4. 中五福
5. 小五福

褂皇: 
金銀線密度100%。金光閃到見唔到紅布。

褂后: 
金銀線密度85-90%。金光閃，但間唔中都見到紅布。

大五福/ 中五福/小五福: 
金銀線密度60-80%。金銀線同紅布比例相對比較平均。

除左顏色之外，裙褂上面亦都有唔同圖案。見得最多嘅龍同鳳係代表龍鳳呈祥、牡丹就代表富貴、而出現喺褂皇嘅五彩雲紋就比喻為美麗、無憂無慮、超凡脫俗嘅新娘子。

價錢方面，當然越多金銀線越貴啦，隨左呢樣之外，仲要睇下套褂有幾多人著過，越少人著過就越貴，所謂嘅「頭褂」，就係套褂你係著第一手，褂皇嘅頭褂，價錢真係並非你想像得到架。

D小姐試過唔同類型，發現褂皇同褂后太少紅色，著上身唔夠紅，再加上因為太多金銀線，顯得身型比較豐滿，所以都係諗住向「五福」類型進發。

由於「尋褂」比「尋紗」容易，加上「冠南華」出名比其他褂舖貴，所以都係睇多幾間先算，走嘅時候嬸嬸仲問我地搵左媽媽衫未，未嘅話仲可以上去樓上西式部睇睇架。

上到西式部，見到婚紗晩裝除左可以租之外，仲有部分放左出黎做sample sale，今次媽媽衫就搵唔成，不過就俾D小姐搵到條敬酒裙，包改一次，價錢同仲平過出去租少少，算係有少少收穫啦。

DJ婚享記 : 試衫篇 - La Reve Bridal

係觀塘區試左兩間婚紗店之後，馬拉松嘅最後一站來到了太子。

La Reve Bridal近住豪華戲院，free trial可以試三件。

D小姐都係試左2件婚紗及1件晚裝，2件婚紗都係一字肩大拖尾，雖然款式都唔錯，但始終都係未及上星期試嘅咁「叮叮叮」。

晚裝試左件綠色嘅，款式較為特別，但略嫌太過閃，D小姐唔係咁喜歡。

雖然呢間店48小時內confirm都可以有優惠，但未confirm前試衫唔可以影相，加上近排試左咁多間，到真係比較時印象已經有d模糊，想做決定都做唔到。

試左咁多間，係時候做決定啦，究竟最後決定係點? 下回待續。

DJ婚享記 : 試衫篇 - Gabriel Bridal

話明馬拉松式試衫，當然係一間接一間咁試啦。

試完Avery Lovell Bridal之後，就係時候趕去同區嘅Gabriel Bridal。

間店特別之處係有唔少婚紗晚裝嘅一字肩係可以扣上去，即係一條裙有兩個著法。

呢度嘅free trial可以試3件，D小姐就試左兩件婚紗同一件晚裝。

由於我地已經主攻一字肩大拖尾婚紗，所以兩件婚紗都係揀類似嘅款，其中一件嘅一字肩仲可以除落黎變心型胸添。

講真，除得落黎嘅一字肩雖然話就話方便，可以好特別咁有兩個穿法，但係如果臨急臨忙唔見左，咁點算呢？再加上，店員日日幫人整就話整得靚，到時臨急臨忙換衫，個效果會唔會好似預期咁呢？婚禮已經好多野要兼顧，真係無時間理咁多野。

晚裝方面揀左一件粉紅色心型胸，顏色係我想要嘅粉紅色，紗上面仲加左少少花，相當搶眼，呢件真係可以考慮嘅。

值得一提嘅係佢條裙仲可以加一字肩，適合唔同style嘅新娘，不過由於D小姐已經決心要揀一字肩婚紗，同類型嘅晚裝就真係唔會考慮喇。

另外，J先生亦都望過下男禮，但主要得中碼及大碼，大碼試著上身都唔係好適合較為大件嘅佢，如果要訂造就加多幾百蚊，計落唔係特別化算。

由於仲有一間店未試，都係完成是日trial先做決定啦。

DJ婚享記 : 試衫篇 - Avery Lovell Bridal

又到星期六，D小姐同J先生都剛巧放假，早上完成其他任務後就好匆忙地食個lunch，然後又繼續我地馬拉松式試衫行程。

第一站係位於觀塘嘅Avery Lovell Bridal，由APM行過去都只不過係幾分鐘時間，值得留意嘅係呢度係無男禮架，J先生話如果D小姐鍾意，佢可以自己再係附近租男禮。

Free trial可以試5件，D小姐試左2件婚紗同3件晚裝。

晚裝試左1條紅色deep V背心小拖尾裙，效果都唔錯，個人都幾鍾意。

第二同第三件試左小拖尾背心裙，一件粉紅色一件粉紫，粉紅色略嫌有d太淺色，同埋前後都係大deep V，驚兩大長老唔鍾意，另外一件粉紫，無論款或顏色都係一般。

婚紗方面主攻一字肩大拖尾，雖然感覺良好，但仍然搵唔返上星期果件「叮叮叮」，不過唔緊要，仲有兩間可以試，再睇睇吧。

DJ婚享記 : 試衫篇 - Bridal Queen

為左爭取係有限時間內揀到適合而又靚靚嘅衫，D小姐連weekdays放工時間都唔放過。是日J先生放假，D小姐就趁住呢個機會抽時間去試衫。

Bridal Queen位於尖沙咀加連威老道，由於店鋪位於舊樓內，無電梯直達，只可以行樓梯，環境亦比較暗，帶老人家黎就要留意喇。

如果like facebook + share嘅話，就可以一小時任試，D小姐就趁住呢個機會試多幾件，睇下搵唔搵到佢嘅dream dress。

由於已經有目標，揀衫變相容易及快左好多：

婚紗：一字肩大拖尾非魚尾

迎賓裙：心型胸小拖尾

敬酒裙：紅色吊帶/背心裙無拖尾

婚紗試左三件，一件算滿意，一件唔差，一件完全唔OK。D小姐試左呢幾件後發現，心口越少accessories就越襯自己。

迎賓裙方面，試左一件藍色，一件紫藍色，兩件效果差唔多，但都未係好「叮」一聲。

敬酒裙方面，試左一件吊帶，一件背心裙，吊帶裙前面望雖然OK，但係後面睇盤骨唔平衡較為明顯，所以out！至於背心裙，前後睇落效果都算唔錯，值得考慮。

呢間店嘅男禮款式比其他店多，J 先生都試左好幾款，睇黎佢都係向銀灰色同埋酒紅色進發，店員仲提醒我地千祈唔好揀黑色，如果唔係就好容易同waiter同埋兄弟撞色架喇。

D小姐最緊張係件婚紗，由於未能搵到件比早幾日件「叮叮叮」更好嘅，都係試埋星期六果幾間先再決定吧。

PS: 原來J先生條腰無D小姐想像嘅咁肥，睇黎佢減肥計劃初見成效了，哈哈。

DJ婚享記 : 試衫篇 - Ethereal Wedding

為左於有限時間內搵到最適合及最靚嘅婚紗及晚裝，D小姐安排左一日去兩間舖度試，今次就黎到位於尖沙咀嘅Ethereal Wedding，值得留意嘅係呢度並無男禮架，但如果真係靚嘅，去第二度租男禮又有乜所謂。

唉，雖然D小姐話就話已經揀好左要target一字肩大拖尾婚紗，但係女人呢家野，成日都改變主意架啦，見試左好幾件類似嘅style，都好想試下仲有無邊d會著得更靚。

同樣地free trial可以試2件婚紗及2件晚裝。

婚紗方面試左心型類別，一件吊帶，另一件無帶。有帶果件，D小姐硬係覺得有d野係膊頭上唔多順眼，至於無帶，唔係唔靚唔好睇，但係同一字肩比較，點睇都覺得一字肩好睇d。

晚裝方面試左一件粉紅色心型胸，上胸加左少少lace，有少少似背心裙。D小姐認為上胸唔好睇，好似普通心型胸會好d，再加上由於腰間有少少accessories，令到盤骨唔平衡嘅情況有少少明顯，所以決定因應喜好再揀過第二條試。

第二條係香檳色心型胸，無論顏色及style都唔差，但硬係覺得差緊d野咁，無「叮」一聲嘅感覺。

睇黎又要繼續戰鬥落去喇，不過試左好幾間店，著過唔同款式嘅婚紗及晚裝，都開始了解自己身型同style，希望會越來越容易搵到自己嘅dream dress啦。

下回待續。

DJ婚享記 : 試衫篇 - Fiancée Bridal Room

自從發生左某婚紗店之可怕經歷後，又要重新振作再去周圍搵衫喇。

無意中俾D小姐發現位於九龍灣嘅Fiancée Bridal Room，上網做過research後，先知道佢地之前原來係係尖沙咀百利。

呢度試身可以免費試4件，D小姐揀左2件婚紗及2件晚裝試。

如果你地有留意之前嘅post，都知道D小姐有脊柱側彎，盤骨左右唔平衡，所以係唔適合著魚尾嘅婚紗同晚裝，變相選擇少左好多，但亦可以更集中搵適合嘅款。

今次試嘅兩件婚紗都係一字肩大拖尾，質料方面都唔同，試完之後D小姐似乎搵到佢dream dress類型喇。

晚裝方面兩件都試左背心類，一件係香檳色low cut，而另一件係淺紫色咩都遮晒無野睇，但兩件無論顏色定係style，D小姐都有少少保留。

店員話要即時confirm package落訂先可以有優惠，但係由於晚裝真係唔岩心水，加上男禮選擇亦唔多，即使婚紗好喜歡，都唔想即時confirm，再繼續試下一間啦。

DJ婚享記 : 試衫篇 - Dxlly Brxdal/ Lx Bxlle/ Hxiley Rxse Brxdal 之可怕經歷

最近睇得太多有關婚禮嘅野，所以facebook同IG都彈左好多相關嘅廣告。由於一直都未搵到我嘅dream dress，所以見到呢d廣告都會留意下。

無意中俾我見到一間叫Hxiley Rxse Brxdal 嘅婚紗舗，見到佢地嘅裙好靚好公主，網上無乜負評 (請留意下文)，價錢又合理，就約時間上去試喇。

由於已經有試衫經驗，加上今次帶左個女仔朋友同我一齊黎，所以都比上一次容易揀，仲即日落左訂添，而尾數就要一星期內俾。

坊間都有話啦，你一日未俾錢，一日都係老細，你俾左錢之後，態度就有可能360度轉變。

落訂前，所有野都正正常常，有問必答；但落左訂之後，佢地就開始現形喇，whatsapp已讀不回，試過幾日唔覆，投訴之後就俾左好多原因點解無人覆(例如同事放左假/出左去做野)，幾十個唔好意思，又俾晒改進方案我地，去哄我地俾埋個尾數。

俾完尾數之後，情況就更加惡劣，whatsapp繼續已讀不回、態度差、解答查詢時模稜兩可等等，無意中係ESD Life見到唔少B2B對佢地嘅投訴，就知自己中左伏啦。

點解之前做咁多research都睇唔到網上咁多負評呢?

由於呢間公司有3個名，分別係Hxiley Rxse Brxdal，Dxlly Bxidal同埋Lx Bxlle，所以咁岩search到其中一間無負評，好大機會就會miss左另外兩間嘅野。

點解whatsapp經常已讀不回我地會咁擔心呢?

佢地講到咁多客，睇唔到message/唔得閒覆，咁有咩事搵唔到佢地，會唔會無時間處理我嘅問題，例如拎d衫去洗去改、或者make sure我Big Day嘅衫係靚靚呢？如果真係咁忙，做唔切，係咪應該接少d客而提高服務質素呢？定抑或係諗住呃多d已經好緊張嘅B2B？

會唔會係自己多疑，諗多左呢?

經ESD Life認識左超過20個「受害者」，如果真係我自己多疑，相信唔會有咁多人有同一感受。

除左服務，呢三間舖仲有咩唔好?

1. 裙褂Package只包一d唔見得人嘅機製褂，如果要upgrade就要加錢，所加嘅錢係仲多過你出去褂舖租件靚靚嘅褂，即係好似你去酒樓飲杯cappuccino咁，你話會唔會好飲？同樣地，點解要俾貴d嘅價錢去係一個唔專業嘅地方租呢？而最大問題係如果唔要件褂，係無得轉其他野的，即係可以話係硬食。

2. d衫保養得唔好，有B2B 報告話一件婚紗前後幾個月，已經變到好殘舊，你叫班B2B 點放心係佢地度揀衫呀?


3. 搵水魚去租一d已經有問題嘅衫，疑似老屈係你整爛，罰你錢，真係一個唔留神就會出事。

早前有個B2B上去試衫，個職員係咁遊說佢試一件婚紗，當時人已經覺得有d奇怪，但係最後都有揀到果件。好好彩嘅係在場男友影左好多相，360度咁影件婚紗，個B2B返度屋企睇返d相時發現原來件婚紗有一大個窿，如果真係租左，攞衫果日先發現又煩，事後俾人老屈又煩。呢件事係巧合定係有心人做，大家好好思考下。

4. 部份package有包媽媽衫，有好多B2B都話d衫又舊又殘，d款仲好唔掂，完全揀唔落手。加上無論package包唔包媽媽衫，試衫限時都係一樣，根本就唔make sense。而同樣地如果唔要件媽媽衫，係無得轉其他野的。

5. 新郎衫款式較少都算，d碼最大得中碼，唔好話肥，就算高d嘅男仕都唔會啱著，不過佢地死都會話可以改到。但大家諗下，到時你都俾晒錢啦，佢改唔到你可以點？

6. 佢地聲稱有歐美名牌婚紗，包括Enzoani、Nicole Spose等等，不過本人係呢d牌子嘅官網無見話受權Dxlly、Hxiley Rxse或Lx Bxlle ，見咁得意，所以問左佢地，得到嘅回覆如下:

> 因為歐美品牌我哋唔係代理商啊，係屬於私人買入for租借的，所以唔需要官方授權㗎❤


7. 聲稱個個月都會返新款，但係每次返幾多件係由「公司決定」，即係唔肯定，「返左」之後想試，又「咁啱」租左出去，有無咁多巧合呢？

DJ婚享記 : 試衫篇 - Classy Bridal

Classy Bridal 呢間婚紗店係我朋友有份開嘅，店舗位於荔枝角，早前sample sale上過去睇，見到d款都唔錯，但係由於無得改之餘，又要搵地方收藏，所以都係打算租，見到佢地嘅價錢都算合理，就約時間上去睇下喇。

由於D小姐有脊柱側彎，揀衫方面有好多限制，女店員都好細心幫佢揀下有咩類型嘅衫適合佢，前後婚紗同晚裝各試左兩件，但都未有「叮」一聲嘅感覺。

印象中，客人join左佢地package之後可以得閒就上去試衫再轉款，總之有期就可以，非常適合一d有焦慮症，好多野擔心，又怕遲d揀到d更靚嘅款而唔敢落訂嘅新娘。

至於男禮，選擇比預期多，款式同質料都唔錯，但係由於女裝未揀啱，所以都想睇多幾間繼續揀下。

DJ婚享記 : 婚展篇 - 婚展 (第三回)

自從籌備婚禮之後，時間真係過得好快，眨下眼又已經一個月，又黎到八月份嘅婚展喇。

由於九月嘅婚展會係九展舉辦，聽人講規模唔會好大，而下次會展舉辦嘅婚展要等到十一月，到時未必有咁多空閒時間再慢慢睇，所以今次目標鎖定婚前檢查同戒指。

同之前一樣，我地兩個窮鬼又用盡唔同方法去拎到免費門票入場，由於時間關係，今次並無join到任何workshop整手工。

其實每一次婚展除左搵想要嘅野外，亦係學野嘅好時機，唔一定要幫襯先至可以走埋去人地個booth度嘅，例如Decor咁，可以睇下唔同公司嘅Decor，睇下近排興d咩、多人整d咩、個市場係點等等；花球方面，絲花、鮮花同保鮮花又有咩分別；而就算未需要咁早訂紅酒，都可以睇下咩價錢訂到咩酒、邊種酒較受歡迎、紅白酒要預幾多、有無邊d酒商係可以俾你退返用剩嘅俾佢地等等，總之唔駛怕醜，了解多d對籌劃自己嘅婚禮更有幫助。

每次婚展都必定有兩間大化驗所推廣婚前檢查，分別係「時代」同埋「美邦」，兩間價錢相約，提供嘅檢查亦都大同小異，而亦唔需要介意直接拎住其中一間嘅單張去另一間買，因為呢個情況好普遍，而經過比較後，再加上有朋友之前係「美邦」度做化驗，所以就決定揀佢喇。

有關檢查內容、服務以及詳情，檢查後再同大家講啦。

DJ婚享記 : 婚展篇 - 婚展 (第二回)

繼上次婚展後，話咁快就黎到七月嘅婚展，同上次唔同嘅係，今次主辦單位唔係「新婚會」，而係「Wedding Expo 香港婚慶．博覽網」，咁同上次一樣，我地都係係官方網站登記拎免費門票，慳得一蚊得一蚊。

其實短時間再黎婚展，主要有兩個原因：
1. 始終仲有好多野未搞掂，黎婚展盡量做多d資料搜集
2. 因為主辦單位唔同，參展商戶都會有唔少嘅分別，可以睇多d唔同嘅舖頭

今次婚展同上次唔同，上次係一個大展館包含晒所有野，今次就分開兩個細d嘅展館，婚攝、租衫、化妝、戒指係一個展館，婚宴場地、佈置、餐酒、餅咭就係另一個展館，而花車、婚前檢查就兩邊都有，可以話係更方便，想搵d咩就去返相應展館。

由於上次已經搞掂左律師，而餐酒同花車亦唔需要咁早決定，所以今次主要睇兩場野：
1. 戒指
2. 婚前檢查

戒指：
其實上次婚展已經有d心水，不過間舖頭今次婚展冇參展，變相可以睇下其他舖頭，但試過幾間都唔係特別岩心水，但亦了解左多左18K黃金同PT950鉑金嘅分別，可以計下兩者嘅差別值幾多。

婚前檢查：
婚展內主要兩大集團：美邦或時代。雖則仲有d較細嘅公司比較平，但始終關乎身體健康嘅野，都係信大集團好d。兩者價錢相若，檢查項目亦差唔多，其實主要睇埋additional嘅項目價錢，拎左單張聽完講解後，我地決定返去做多d research，下次婚展再做決定。

下個月又會再去婚展，到時再update大家。

DJ婚享記 : 婚展篇 - 婚展 (第一回)

香港一年有大約12次婚展, 即係平均每個月都有一次，一般黎講會係九展或者會展舉行，聽到好多朋友講，九展果個婚展真係唔係咁多野睇，會展果個規模大好多，有多好多野睇，既然係咁，我地一於等六月頭去會展行婚展。

門票盛惠二十蚊一張，兩個人去，即係代表要俾四十蚊，結婚要洗咁多錢，當然係用盡一切方法省得一蚊得一蚊啦，係機緣巧合嘅情況底下, 我地發現左「新婚會」呢樣野，加入左之後，可以獲贈門票兩張同埋免費參加場內兩個workshop。

輕鬆換咗門票後，我地就開始我地嘅婚展之旅，之前聽好多朋友講，婚展會有好多影相嘅sales不停拉客，特別係台灣嘅婚攝公司，由於我地已經搵咗Pre-wedding，所以最好嘅方法就係唔理佢地，直行直過，因為如果俾佢地捉住就有排煩了。

其實入黎之前已經決定咗有幾樣嘢想睇 :
1. 律師
2. 花車
3. 戒指
4. 餐酒

律師 :
婚展入面其實只係得兩個律師攤位：1. 葉謝鄧律師行；2. 壹誓證婚，兩間做法都係一樣，先俾個大日子佢，佢再睇下有咩律師 available，之後你可以睇片決定自己鍾唔鍾意；原本我地只係諗住睇下，下次婚展先再做決定，但出乎意料嘅係「葉謝鄧律師行」雖然聽落好大間，會做證婚嘅律師只有大約二十個，而且雖然距離我地嘅好日子仲有一段時間，但available嘅律師已經剩返唔夠十個，睇完片後覺得好似麻麻，就決定去「壹誓證婚」碰碰運氣，但同樣地available嘅律師十隻手指數得晒，而質素亦非常一般，權衡輕重後，始終覺得「葉謝鄧」比較信得過，所以就再去睇多次，但睇完片後都仲係揀唔落手，咁岩睇到加多三百蚊可以揀「星級律師」，就順便睇埋片啦，一睇之下就發覺呢三百蚊真係物超所值，我地毫無異議下就決定呢位「星級律師」。

花車 :
平時行金都同百利都見到唔少租花車同旅遊巴嘅鋪頭，今次係婚展見到嘅同平時嘅分別唔大，加上我地未有正式出門時間同行程，所以都係做住資料搜集先。

戒指 :
由於我地亦唔太想花錢追求名牌子嘅對戒，所以都係諗住向「樓上舖」進發。

平時上樓上舖，左睇右睇又唔係買，一定俾班店員煩死，係婚展就無咩所謂啦，個個走黎試完好多都唔係即刻買，無咁尷尬之餘仲可以係短時間內睇盡唔同品牌唔同款式。

餐酒 :
由於我幾乎滴酒不沾，所以餐酒呢個項目係J先生全權負責。

場內有好幾個booth試酒，比市價平好多，就算圍數少都應該夠min charge免費送貨去婚宴場地。

由於訂完後短時間內可以出貨，所以我地都係諗住遲D先至訂吧。

下一個月嘅婚展亦都會係會展，但會由另一個主辦單位攪，到時睇下仲有D咩睇先。

DJ婚享記 : 影相篇 - Bliss

落實場地之後，下一樣野就係搵Pre-Wedding喇。好多人都會去婚展搵Pre-Wedding，始終優惠多又集中，但因為下次婚展要去到六月，我地都唔想浪費呢段時間，加上係無目標下去婚展搵資料有如「盲婚啞嫁」，咁岩D小姐朋友早前結婚揀左呢間Bliss，所以就黎睇下。


職員都相當努力介紹唔同嘅package俾我地，我地主要有3個options:

1. 3個本地景點

2. 3個本地景點 + 1個studio

3. 3個本地景點 + 深圳基地

深圳基地共有四個，分別係「哈施塔特」，「婚紗城」，「玫瑰海岸」同埋「環球影城」。

四個基地裡面我地對「哈施塔特」特別有興趣，「哈施塔特」攝影基地位於惠州博羅縣，由深圳去大約需要1.5小時車程，呢個地方以奧地利嘅Hallstatt小鎮為建築藍本打造，佔地近1000萬平方米，三面環山，內擁17平方米原生內湖，將濃郁嘅奧地利建築風格歐陸人文風情帶到基地內，等準新人佢地彷若置身於童話世界中。

最後我地揀左影3個本地景點同埋「哈施塔特」攝影基地，黎緊九月十月會影啦，到時再同大家update。

DJ婚享記 : 影相篇 - My Dream Wedding

知道係Renaissance擺酒會送 My Dream Wedding 婚攝coupon之後，一直都有留意呢間公司嘅作品同埋服務，見到佢地無論外景定studio都影得唔錯。

是日收到酒店寄黎嘅coupon，細心研究後，終於得知係咩一回事喇。


憑coupon可以$4888呢個極之優惠嘅價錢影一輯相，聽落真係非常吸引，咁究竟呢個價錢又包D咩呢?


- 5小時服務，只限香港境內一個地點

- 婚紗一件

- 新娘化妝set頭一次

- 新郎化妝一次

- 可從40張相內揀10張相，但無底片提供，亦唔包執相

- 從呢10張相當中，可以印三款唔同size嘅相，10張細，1張中，1張大，但唔包相框

- 唔包男裝禮服，新娘飾物及交通費

- 只限星期一至五，公眾假期除外

簡單D黎講，要請一日假攪咁多野，只係得10張無執過嘅相，仲要連底片同男裝禮服都無，簡直完全浪費時間同金錢。

DJ婚享記 : 場地篇 - Eaton Hotel

其實自從睇左Renaissance之後，我地都無咩心機再去睇第二d場，不過既然一早約好左，咪睇埋佢攞，當見識下都好，而且話唔埋有意外驚喜呢？

好可惜去到lobby時，感覺已經唔係太好，無果種係Holiday Inn及Renaissance「叮」一聲嘅感覺，因為呢度俾到我地一種youth hostel嘅感覺，唔似酒店。

Michelle Ballroom最多容納18圍，但係目測已經覺得會非常逼，聽職員講如果要擺18圍，其中一圍已經差唔多要擺到新娘房門口，而新娘房設於ballroom裡面，換衫進場會唔多方便，所以都唔會考慮啦。

DJ婚享記 : 場地篇 - Renaissance Harbour View Hotel

D小姐對呢間酒店嘅認識係源於某親戚幾年前係呢度舉行過婚宴，當時嘅佢從來無幻想過自己有朝一日可以係呢度舉行婚禮，可能係因為酒店嘅地段同埋果種華麗感覺令佢覺得價錢肯定不非啦，直到近一年幫公司攪event，知多左租用唔同酒店場地嘅價錢之後，就令佢對Renaissance呢間酒店產生興趣喇。

上過呢間酒店嘅網址見到2019年婚宴價錢之後，覺得尚算可以接受，就一於send email問關於2020年嘅價錢啦。

收到報價之後，真係喜出望外，價錢俾我地想像中超值，而且由於我地好日子係淡季，多左好多唔同嘅優惠。

由於我地有大約17圍，酒店方面安排左Oasis Plus呢個ballroom俾我地，呢個地方其實就係Oasis room + Concord III 呢兩間房合拼嘅。

因為J 先生工作關係，我地分開左兩日做site visit，第一日就由D小姐自己去睇Oasis plus，當時正正有17圍檯，令佢可以visualise 到係度擺酒嘅情況，之後就順便同sales商討細節喇。而第二日就同J先生一齊去睇Oasis Room。雖然J 先生唔能夠睇到呢間房同Concord III打通後同埋放左17張檯嘅情況，但個玻璃天慕已經俘虜左佢，令我地無乜困難下已經可以下決定。

睇完場我地雙方都好滿意，下一步當然係再繼續商討細節啦。淡季果然有著數，有好多野都可以爭取到，可惜因為仲有一個場未睇，同埋要向四大長老作最後請示，唯有拖多幾日先至confirm酒店啦。

DJ婚享記 : 場地篇 - Holiday Inn Golden Mile

對於D小姐黎講，呢個場地相當有童年回憶，事關藝術白痴嘅佢居然可以係小一時參加玩具反斗城嘅填色比賽攞到優異獎，獎品係帶同一個朋友黎酒店食自助餐，對於小朋友黎講呢個獎品真係大獎黎架。

係我地收到酒店嘅報價同埋婚宴資料後，我地立刻約時間睇場，適逢果個weekend 係酒店嘅open day，我地就索性趁機黎睇場啦。

Holiday Inn 嘅ballroom 有分A, B, C 三part。A 大約可以容納16圍，B+C 大約27圍，而A+B+C 就共48圍。

Ballroom 入口非常Grand，而且仲有我喜愛嘅樓梯，裡面無論樓底或氣氛都相當令我滿意。

新娘房方面會有兩個，兩個面積都唔大，只有其中一個有獨立廁所，不過呢樣野比起場地黎講都算係其次。

好可惜，site visit 嘅中段我地發現，原來如果只係book 合乎我地圍數嘅Ballroom B+C，進場時就唔可以用上圖嘅正門，要用側門進場，要經過走廊同廁所，俾人一種「走後門」嘅感覺。加上假若ballroom A 同時有人book嘅話，我地嘅賓客需要經過佢地嘅reception，先至可以去到我地嘅ballroom，真係有少少唔係太方便。

為左解決我地呢個煩惱，當日嘅sales 俾左幾個建議我地：

1. book晒ballroom A+B+C，但係以我地只有17圍黎講，min charge實左會太高。
2. 降低圍數至16或以下，去book ballroom A only。但係book ballroom A 嘅條件係based on ballroom B+C 有人book，換句話講，即係要等+等+等。再加上，若果只係book ballroom A嘅話，我地唔會有新娘房，要換衫轉妝嘅話只能上酒店附送嘅房間，唔係太方便。
3. 賭一鋪，如果ballroom A最後無人book嘅話，可以俾埋我地嘅，但係呢樣野要到婚禮前幾日先知，一生人一次嘅大事，所有佈置要last minute改動，係咪我地想要嘅野呢？ 再加上，只擺17圍嘅我地去用一個擺到48圍嘅場地，個感覺會唔會太「吉」呢？

由於實在太多顧慮，所以都係睇埋其他場地再作打算吧。

DJ婚享記 : 婚宴場地

我地第一個task 就當然係搵場地。由於我地無宗教信仰，所以都係主力搵晚宴嘅場地。

我地要考慮嘅範圍有好幾個：
- 市區鐵路沿線
- 酒店
- 場地唔好有太多柱，同埋要視野良好
- 最後當然就係價錢啦

因應我地嘅budget同埋圍數，我地首先上網搵左一d合乎我地要求嘅場地，再send email 去問佢地攞進一步嘅資料同報價。一般黎講，大部分場地係網上都搵到好多同價錢相關嘅資料，只有少部分係無公開。

我地前後向大約20間酒店查詢，全部都係幾日內回覆我地，都算非常efficient，始終對酒店黎講算係一單大生意。

為左係有限嘅budget做到最多同最好嘅野，我地選擇係淡季舉行婚禮，亦都可能因為咁，係我地查詢嘅時候，大部分酒店係我地心水日期都仍然有期。

所謂合乎budget，除左要每一圍計埋飲品同加一嘅價錢合心水之外，仲有第二樣野，就係最低消費啦。

有好多間酒店，雖然每圍價錢好合心水，但係可惜可能因為場地較大，佢地最低消費實在太高，所以我地無去選擇，最後只有7間酒店係我地選擇範圍內。

係呢7間裡面酒店包括左一d未必係人人都識，一d較舊又或者未合乎我地standard 嘅酒店，最後我地只係揀左3間做site visit。

DJ婚享記 : Budget (錢、錢、錢)

當我地決定結婚後，好快就安排左家庭聚會去通知雙方家長同進一步了解佢地對呢場婚事嘅要求，隨後我地就好似好多準新人咁，開始整左個無敵嘅excel 表去計劃各項細節嘅預算同埋價錢比較啦。

大家可以去以下嘅網址參考一下：

http://wedding.expo.com.hk/v12/tools.php